15 يونيو حزيران (خدمة رويترز الرياضية العربية) - كال حسام حسن مدرب منتخب مصر لكرة القدم المديح للاعبيه بعد التعادل 1-1 مع بلجيكا في مستهل مشوارهما بكأس العالم لكرة القدم المقامة في أمريكا الشمالية اليوم الاثنين بينما ركز حمزة عبد الكريم، الذي بات أصغر لاعب سنا يمثل مصر والعرب في النهائيات، على الإنجاز الجماعي أكثر من الفردي وقال زميله إمام عاشور صاحب هدف مصر اليوم إن الفريق لم يأت إلى الولايات المتحدة وكندا والمكسيك ليكون مجرد ضيف شرف.

وحرم هدف عكسي مصر من تحقيق أول انتصار لها في تاريخ مشاركاتها بالنهائيات في ظهورها الرابع.

وقال حسن الهدف التاريخي لمنتخب مصر لشبكة بي.إن سبورتس "الحمد لله والشكر لله طبعا، سعيد بلعيبتي وإنهم بيتطوروا بالشغل اللي أنا عايزه بالنسبة لي سنتين بحاول إن أنا أرسخه في ذهنهم ونشتغل بيه والتاكتيك وفي كل حاجة، إن هما يبقى بنلعب كورة مختلفة مع أي حد.

"أصريت إن أنا ألعب مع منتخبات كبيرة . قبل كأس العالم، النهاردة بلجيكا من ضمن الخمسة ستة سبعة منتخبات أحسن منتخبات في العالم وأحسن لعيبة موجودة عندهم. وإحنا اللي بدأنا بالهدف الأولاني وهما اتعادلوا، أعتقد إن إحنا كنا أقرب للفوز"

وضع عاشور مصر في المقدمة في الدقيقة 20 بتسديدة هائلة من خارج منطقة الجزاء بعد تمريرة رائعة من محمد صلاح الذي احتفلت الجماهير بعيد ميلاده 34 في المدرجات من خلال اللافتات وحيته فور خروجه في الدقيقة 76 ليحل عبد الكريم بدلا منه ويحقق هذا الإنجاز التاريخي في سن 18 عاما و165 يوما.

وأصبح عاشور رابع لاعب يسجل لمصر في تاريخ مشاركاتها في النهائيات بعد عبد الرحمن فوزي ومجدي عبد الغني وصلاح.

وكادت مصر أن تضيف الهدف الثاني في أكثر من مناسبة خلال الشوط الأول وبداية الشوط الثاني خاصة عبر عمر مرموش ومصطفى زيكو قبل أن يسدد كيفن دي بروين ركلة حرة في الدقيقة 53 في القائم.

وتعادلت بلجيكا في الدقيقة 66 عبر هدف عكسي من محمد هاني الذي أودع الكرة في شباك الحارس مصطفى شوبير تحت ضغط من روميلو لوكاكو الذي كان قد حل بديلا قبلها بعدة ثوان.

وتعملق شوبير في أكثر من مناسبة خلال المباراة لتخرج مصر بنقطة ثمينة من مباراة كانت قريبة فيها من تحقيق إنجاز تاريخي.

وأضاف حسن "إحنا كنا أقرب للفوز، الفرص بتاعتهم كادت تكون إحنا لصالحنا أكتر. لينا ضربة جزاء! اللي أنا مستغربله إن ولا في.. ولا في فار، ولا في الحكم فكر إن هو يعيد يبص على الفار أو يوقف اللعب، لكن دي في ضربة جزاء مليون في المية! لو علينا كانت اتحسبت، لكن في النهاية أنا بتكلم على المباراة كتوتال أنا سعيد وراضي على أداء لعيبتي، مع الجو اللي إحنا بنشتغل فيه دهون على الفرقتين.

"لكن أنا.. أنا بقول للناس إن زي ما قلت في المؤتمر الصحفي: لا.. إحنا منتخب مصر مش قليل حتى لو كنا خسرنا، لا.. علينا بصمة وهنشتغل، والتطور اللي أنا بفضل الله أنا اشتغلت بيه من سنتين وظاهر على الفرقة وبنلعب كورة مختلفة عن السنين اللي فاتت وهو ده الأهم. ولسه بنتطور، وزي ما قلتلك في المؤتمر الصحفي إحنا عندنا تلات مباريات، التلات مباريات مهم لينا إن إحنا نعدي الدور التاني، الأهم نعدي الدور التاني.. خلصنا من مباراة طلعنا بنتيجة إيجابية، بنفكر في المباراتين اللي جايين أو المباراة اللي جاية نمرة.. واحدة واحدة إن شاء الله".

من جهته قال حمزة عبد الكريم مهاجم شباب برشلونة الذي ضمه المدرب حسن لقائمة المنتخب الأول لأول مرة ليصبح أصغر لاعب سنا يمثل مصر والعرب في النهائيات رافضا التركيز على إنجازه الشخصي "المباراة كانت كويسة للفريق كله، وكل اللعيبة كانوا نازلين عايزين التلات نقط. خدنا نقطة في الآخر، بس إحنا قدمنا كل اللي عندنا وعملنا كل حاجة. ولازم نشكر الجماهير اللي جت وساندتنا، الأجواء بجد كانت عظيمة جدا ودلوقتي إحنا خلاص بنركز في الماتش الجاي"

وأضاف "إحنا عارفين طبعا إن بلجيكا فريق كبير وعنده لعيبة على مستوى عالي وجودة عالية، بس مقدرش أقول إن ده كان أصعب ماتش أو أسهل ماتش، كل الماتشات بالنسبة لنا صعبة، وبنلعب فيها دايما على التلات نقاط.

"زي ما قلت، الأجواء كلها كانت ممتازة بفضل الجماهير، ولازم نشكرهم جدا على الوقفة دي، ومستنيينهم الماتش الجاي عشان يعملوا لنا أجواء أحسن وأقوى كمان".

وقال عاشور صاحب هدف مصر اليوم "كنا عازمين إن إحنا نأكد بجون واتنين وتلاتة، اللعيبة بصراحة عملوا.. عملوا ماتش كبير جدا، بشكرهم طبعا وبشكر الجهاز الفني.

"يمكن.. مش عارف.. أكيد زعلانين، أكيد كل الناس زعلانة، كان نفسنا نكسب الماتش، ضيعنا كتير ورحنا للجون كتير.. الحمد لله ربنا كرمنا بـبوينت (نقطة)، وإن شاء الله بإذن الله الماتش خلص خلاص، عندنا الماتش الجاي إن شاء الله هنفكر فيه، وبشكر الجمهور طبعا اللي كان موجود النهارة".

وأضاف "لا أكيد طبعا، يعني اسم.. اسم مصر لوحده كبير مش أنا طبعا اللي هأتكلم على اسم مصر.. لا، اللعيبة كبيرة، معانا أحسن اتنين لعيبة في العالم.. بيدونا دافع أكيد، وزي ما أنت قلت، لا إحنا مش جايين ضيف شرف خالص، كان في إيدينا المكسب النهاردة لكن ربنا ما أرادش، وإن شاء الله بإذن الله الماتش الجاي نقدر نعوض الماتش بتاع النهاردة بإذن الله، وربنا يكرمنا إن شاء الله الماتش الجاي بإذن الله".